政情：涉打人「梁粉」身份曝光
網上組織「愛護香港力量」日前舉行「挺梁治港保民生」遊行，有人喺遊行出發前向電視台攝影師後腦揮拳，混亂期間十多人扭作一團且互有推撞添。
據聞呢位涉嫌打人嘅「梁粉」係慕詩（Moiselle）集團旗下司機，但唔知係咪巧合，呢位司機已離職。慕詩太子爺陳柏熹話呢位司機嘅離職同政治立場無關，但認為司機喺事件上係過分衝動。
慕詩旗下司機已離職
打人「梁粉」涉嫌向電視台攝影師後腦揮拳後，其身份一直係個謎，但有傳佢係慕詩嘅司機。
剛巧陳柏熹前日出席除夕活動時，被問及打人「梁粉」係咪佢司機時，佢承認對方係公司旗下司機，但唔知係辭職定係被解僱，只係收到秘書通知，個司機已last day。對於司機點解打人，陳柏熹話佢都係聽人哋講，又強調司機嘅離職同政治立場無關。警方發言人接受查詢時稱，一名六十一歲男子於上月三十日涉嫌推撞另一名卅一歲男子，佢因涉嫌普通襲擊被警方拘捕，今個月下旬返警署報到。