中環出更：元旦馬場眼前一亮
新年新氣象，尋日沙田馬場舉行元旦賽馬日，亦有好多令人眼前一亮嘅新面孔。先係馬會大董兼恒隆地產董事總經理陳南祿（Philip），與一名妙齡女郎十指緊扣入場，細心一看，原來係Philip嘅囡囡Michelle，小妮子激瘦咗兩個碼，成個人靚晒。政制及內地事務局局長譚志源（Raymond）亦拖埋千金譚希文入場，趁元旦假期輕鬆吓。
陳南祿囡囡 激瘦兩個碼
喺美國讀緊書嘅Michelle話，佢每日入健身房做運動，初時每日做一小時，依家加碼做足兩個半小時，已經堅持咗一年。一路細心聽囡囡講嘅Philip就忍唔住插嘴笑稱，讀緊書先至咁得閒，要搵食嘅人邊有咁得閒吖！不過，Philip都好驕傲囡囡嘅蛻變，仲笑笑口問，囡囡係咪好似佢喎！
大慈善家胡寶星一家運勢好到沒法擋，近排頻頻拉頭馬，尋日捧走「華商會挑戰盃」獎盃，一百三十六萬獎金袋袋平安。胡家驊及胡家驃兄弟偕太太風光拉頭馬，認真好運。
