政情：今日你上鏡：林鄭「菱」舍開心
尋日溫度突然驟降至攝氏十度，加上係星期日，唔少打工仔都寧願匿喺屋企避寒，但「好打得」嘅署理行政長官林鄭月娥就無懼寒風，應邀出席一個慈善活動嘅開幕禮。
只見佢着住件大會提供嘅風褸，下身就着住條單薄嘅西褲及平底鞋，真係睇見都覺得佢凍。難得林鄭依然保持住滿面笑容，同在場參加者握手傾偈。
之後大會攝影師準備同主禮嘉賓及參加者影大合照，叫大家一齊用對手做個心形手勢，唔知點解林鄭點做都做唔到個靚嘅心形，佢就偷偷地望吓隔籬點做，但都係學唔足，最後只係勉強擺咗個近似嘅菱形出嚟，莫非佢對手凍到僵咗？