政情：兆源阿容拉埋天窗 「大姑奶」麥美娟high爆
工聯會尋日嫁女，去年喺區議會選舉擊敗工黨主席李卓人嘅元朗區議員、「工聯小花」劉桂容（阿容），同黨內拍檔、荃灣區議員葛兆源尋日拉埋天窗，結束六年愛情長跑。同新郎親如姊弟嘅立法會議員麥美娟（Alice）直言「好high，好興奮！」當正自己結婚咁高興。
要求新人跪地斟茶
一對新人尋晚筵開六十幾圍，單拖到場嘅Alice自詡「大姑奶」，大手筆買金鏈作賀禮，仲要新人跪地斟茶孝敬佢呢個「大姑奶」添！眾所周知「黃金剩女」Alice好恨拍拖，早前更託特首梁振英（CY）介紹好男仔畀佢識，可惜似乎冇乜聲氣！工聯一眾老將，包括榮譽會長陳婉嫻、黃國健同王國興當然有到賀啦。
葛兆源喺二人製作嘅微電影中真情剖白，憶述第一次表白時對方竟然瞓着咗，第二次諗住上門慶祝阿容廿二歲生日時，亦因去錯樓層而摸門釘。好彩兩人喺樓下相遇，葛兆源把握機會表白，先有六年後嘅今日咋！