中環出更：林達民鄺美雲 一見鍾情
近年醉心珠寶生意嘅社交界名媛鄺美雲（Cally），早前承認同被喻為恒基主席李兆基（四叔）愛將嘅恒基營業部總經理林達民（Thomas）蜜運中，卓妮前日咁啱喺跑馬地馬場見到一貫貴氣打扮嘅Cally，陪伴伊人身邊嘅就係真命天子Thomas。當晚兩人拍拖去撐朋友嘅愛駒出戰，兩人有講有笑，賽事後就結伴離去。
因珠寶展結緣
卓妮尋日致電Thomas，佢大方承認兩人由七月開始拍拖，至今已五個月。講起相識過程，原來為恒基旗下樓盤銷售揸旗嘅Thomas，早前經朋友介紹Cally合作舉行珠寶展，諗住為旗下地產項目造勢，點知兩人一見鍾情，好快就墮入愛河。Cally為咗避嫌，最終場珠寶展都係冇搞到。
Thomas對女友讚不絕口，話Cally捐助內地近五十間學校、做珠寶又養馬，仲係香港佛光會會長，難得喺時間管理方面仍然做得好好。咁兩人幾時拉埋天窗？Thomas甜笑話仲享受緊拍拖嘅感覺，結婚遲啲先講啦！
卓妮