中環出更：沈運龍聖誕嫁女狂歡P
做珠寶生意嘅中華廠商聯合會常務會董沈運龍（Aaron）最近榮升外父，沈家大女沈懿綾（Elaine）與美籍台灣移民第二代鄧英偉（Albert），揀正喺聖誕節舉辦婚禮。一眾城中老友好畀面留港參加喜宴，Aaron坦言十分感激，自備二百幾支自家入口靚葡萄酒款客。眾人暢懷盡飲兼跳舞狂歡，齊齊歡度難忘嘅聖誕派對。
兄弟團似足聯合國
當晚到賀賓客逼爆現場，包括啱啱當選港區全國人大代表嘅廠商會永遠名譽會長黃友嘉、「耳機大王」楊志雄夫婦、電子業商會副會長嚴玉麟夫婦、廣東社團總會副會長史立德夫婦、寶源基業主席戴澤良夫婦、仁愛堂主席黃達東及「珠寶大王」謝瑞麟等。經常容光煥發嘅廠商會常董兼漢生堂藥業董事長李嘉音，一到場就被眾姊妹圍住請教養生秘訣，講得眉飛色舞。
新娘Elaine係Aaron與前妻遲正君所出，當日兩人齊心為愛女送上祝福，氣氛好溫馨。好多老友甫入場以為新郎係洋人，事關兄弟團有齊白、黑、黃、棕色種人，個個執到官仔骨骨，唔講都睇唔出邊個係新郎。Aaron笑稱，一對新人自細喺外國長大，伴娘及伴郎都係專程由外國來港幫手，似足聯合國。
Aaron話，Elaine自細洋溢藝術天分，當年報考大學時，有五間學校提供獎學金收佢，但囡囡獨愛學費最貴、世界四大設計學府之一嘅紐約帕森斯設計學院（Parsons），連埋生活費每年要過百萬元，供書供到佢差啲破產喎！一對新人婚後將定居美國，Aaron幾咁不捨都要放手，惟有獻唱一曲，憑歌寄意喇！
卓妮