政情:公民講場:遊行被斷財路 泛民頑抗

泛民一月一日發起元旦倒梁遊行,不過警方今年就唔准佢哋喺遊行期間喺途中設置街站籌款。一班泛民議員尋日就做晒大龍鳳反對,工黨李卓人話,過去咁多年嘅遊行示威都冇禁擺街站,警方咁做係打壓言論自由。公民黨梁家傑亦都批評唔畀擺街站等同壓制民意。班泛民議員已矢言到時實行街站照擺咁話,講到好似公民抗命咁。其實佢哋遊行籌款嘅收入一向都好和味,泛民主派年年都靠遊行撲水,掠得幾多得幾多,十足十酒家賣月餅夠成年開支咁掠水,唔畀佢哋籌款即係斷咗佢哋米路,當然要同你死過!