政情：龐愛蘭擺阿仔上枱
從政嘅人輸咗選舉，未必係絕路，早排有劉江華獲委任做副局長，最近有新論壇龐愛蘭（Scarlett）。本身係沙田區議員嘅Scarlett同劉江華一樣，都係出戰立法會而落敗，雖然唔係做官，但明年一月將會被委任做浸會大學校董。Scarlett就話自己同浸會無乜淵源，既無讀過浸大，亦無幫過浸大手，反而囝囝就喺浸會醫院出世。唔知咁樣有無關係呢？
Scarlett其實只係講笑，佢話浸大邀請佢做校董，係因為對方欣賞自己多年嚟嘅青年工作，自言事前從無接觸過浸會，證明浸會唔係用人唯親，而係有合適人選就揀。Scarlett收到邀請後評估過工作量，聽聞校董會一年只開四次，相信唔會影響到區議會工作，所以一口答應咗。
講開又講，Scarlett話囝囝除咗喺浸會醫院出世，細個時仲喺浸大附近嘅畢架山小學返學，似乎佢同浸大都好有緣分。不過Scarlett話，囝囝依家喺澳洲讀緊大學二年班，自己做校董後可以認識大學多啲，第日又可以接觸多啲後生仔，對自己同囝囝都有好處。