政情：陳淑莊一身輕周圍飛
公民黨副主席陳淑莊（Tanya）甩咗拖之後又落選立法會議員，經歷「雙失」嘅佢一度失晒魂，但無耐就重拾心情，短短幾個月內已經去咗幾次旅行散心。前排佢又同咗兩位女性朋友去不丹參加洗滌心靈之旅，轉個頭又飛去泰國曼谷瘋狂掃貨，嚟緊又計劃喺天氣熱番啲時，陪媽媽去日本北海道玩，反觀佢班舊戰友就被困喺立法會應付拉布戰，真係得失難料。
Tanya話，不丹國民對外國人零舍親切，當地嘅文物保育亦做得好好，不愧為幸福指數最高嘅國家。不過最令佢懷念嘅，並唔係不丹嘅風土人情，而係三個女仔喺酒店嘻嘻哈哈嘅相處時光喎。
黃碧雲大棚人過大海
唔去旅行留喺香港嘅時候，Tanya會匿喺屋企做宅女，一口氣煲晒英國電視劇《Downton Abbey》嘅第一、二、三季，偶爾先以大律師身份接番幾單官司搵外快，認真疏乎。問佢會唔會趁依家得閒積極搵番個男友，佢就話有新戀情一定會通知大家喎！
立會新丁民主黨黃碧雲（Helena）前日亦趁聖誕假期，同老公加一班中學同學去咗澳門一日遊，主要係去食葡國菜同睇燈飾，過關時一度擔心當選議員後會被拒入境，幸好最後順利過關。佢計劃喺一月初再同老公去越南河內過二人世界，之後先返港為彈劾特首議案同施政報告再忙過。