政情：張俊勇預告捲土重來
首次參選港區人大代表嘅中華總商會會董張俊勇（Thomas），最後只能取六百多票落選，轉個頭佢就同太太及囡囡飛往澳洲度聖誕，唔通係失望得滯要去旅行散心？非也，Thomas笑言會以平常心面對賽果，又形容今次係好好嘅練兵機會，若然有機會，下屆一定捲土重來喎。
帶囡囡過暖笠笠聖誕
選舉結束後，Thomas急不及待飛往現正係夏天嘅澳洲，同家人過番個暖笠笠嘅聖誕。Thomas家人以前曾移居澳洲，熟晒地頭，今次行程包括暢遊悉尼、墨爾本及黃金海岸，大擦當地嘅新鮮海鮮。
最開心仲係兩個女，由朝到晚拉住爸爸傾心事，彌補早前因忙於參選人大而少咗傾偈嘅時光。Thomas話，八歲嘅大女同五歲細女，不知不覺已經大咗好多，口脗似足大人咁老積添。
Thomas呢次出門，會玩到一月初過埋新曆年先返香港，屆時要四圍「還債」，事關早前選舉，唔少好友義不容辭相助，欠落唔少人情債喎。