政情：Ann姐暫別珠光寶氣
民建聯副主席蔣麗芸（Ann姐）過往出名珠光寶氣，周身都掛滿各式各樣嘅首飾，但自從拍板參加立法會直選，尤其係喺低收入人士較多嘅九龍西選區出選後，佢就有意無意咁收起晒啲珍藏，打扮平實咗好多。佢尋日更聲言自己唔少首飾都只係「朱義盛」，真係信不信由你。
老公無緣人大 唔使安慰
尋日係平安夜，Ann姐出席記者會介紹民建聯一項民意調查時，專登着咗件紅色衫扮聖誕老人應吓節，不過以往珠光寶氣嘅佢，尋日就淨係戴咗對珍珠耳環，直言咁嘅打扮啲九西街坊最受落。佢自言過往都唔係好珠光寶氣之嘛，只不過有時為咗保值，咪買啲「大粒啲」嘅首飾傍吓身囉，不過自從當選議員，成日要落區，所以都無咩機會戴，惟有將大部分首飾都放晒入保險箱。佢又聲言自己唔少首飾，都只係「細細粒」嘅「朱義盛」，買嚟純粹係為咗襯衫，依家佢覺得心靈嘅平安同喜悅重要啲喎。
Ann姐老公梁海明上周失落港區人大選舉，但佢直言唔使安慰老公，因為大家一早有心理準備，始終老公備選得比較遲，參選只為表達服務國家嘅心志，最後攞到六百幾票，做到候補代表已達到目的。做咗廿年全國政協委員嘅佢，亦已決定唔再爭取連任，專心做好立法會同地區工作。