中環出更：「末日」遊戲展 搞慶項明生
為期四日嘅亞洲遊戲展尋日閉幕，卓妮都有去湊熱鬧，但見場內人數寥寥無幾，作為主要參展商嘅Sony Computer Entertainment香港公司董事及總經理項明生（James）大呻損失慘重，其中一個原因係今次遊戲展撞正冬至兼「世界末日」，令市民到場參觀同消費嘅意欲大減。
James對住卓妮好激氣咁話，今年展覽嘅安排係十一年嚟最差，以肉眼估計，入場人數起碼少三成，除咗受世界末日嘅傳言影響，仲因為主辦單位宣傳不足，冇安排內地旅行團參觀，場內冷清到可以踢波。佢仲話唔排除明年會放棄參展添。
瑪雅人指破舊立新
曾經去過墨西哥同瑪雅遺裔親身接觸嘅James表示，瑪雅人根本冇擔心過世界末日，反而好開心咁放炮仗大事慶祝，事關對佢哋嚟講，當日其實係另一個曆法嘅開始，代表破舊立新，只係有人誤解咗意思啫。
為咗今次遊戲展，James呢幾日都要喺會展附近嘅酒店度過，錯失咗同家人做冬同「共度末日」嘅機會，因此今日聖誕節會同家人擦番餐聖誕大餐補數。