中環出更：肥胡連趕兩場好精力
好多政商界名人晚晚都有應酬飯局，而且經常撞晒時間，如果唔想顧此失彼，惟有一日連趕幾場。好似醫院管理局主席胡定旭（肥胡），雖然佢已經卸任香港總商會及智經研究中心主席，但百足咁多爪嘅佢，依然喺政商界圈中非常活躍，卓妮早前就見到肥胡一晚趕兩場，應酬到夜一夜先走，生活真係多姿多采。
上周四晚上十點零鐘，身穿西裝嘅肥胡喺港島尚圜酒店行出來，隨行仲有兩名女友人。佢哋步出酒店後，就行到附近街道登上一部豪華七人車離開，原來係前往中環四季酒店趕下場。
酒店門口 雞啄唔斷
當七人車抵達四季酒店後，由於現場泊滿晒車，三人就喺車與車之間落車，其中一位女友人仲有禮貌輕扶肥胡嘅手臂添，然後一齊步向酒店大門。臨近酒店大門時，肥胡突然急步上前，原來係遇到熟人打招呼，仲企喺酒店門口傾到雞啄唔斷，其中一個熟人疑似係前高官、香港房屋協會主席鄔滿海。
卓妮尋日問肥胡當日有乜聚會咁高興，佢就話當晚約咗一班證券界嘅朋友喺港島尚圜酒店食日本菜，咁啱同一晚佢又約咗另一個朋友飲咖啡，所以就一齊趕去四季酒店會合其他朋友囉。
問佢同行嘅兩位女士係邊個？肥胡就話佢哋係兩母女，大家都係好朋友，所以食飯敍吓舊啫。
卓妮