通常含住金鎖匙出世嘅富家子女，都係唔使捱苦兼且可以呼風喚雨，無所事事得嚟就算唔係沾染惡習，脾氣都可能唔多好，極之寸嘴。
好似富家女「瑤瑤」咁，出身於有錢人家，成世都唔使憂，但咪以為唔使捱嘅人心情靚啲、脾氣都好啲喎，「瑤瑤」就係嗰種郁啲就發脾氣，極難服侍嘅千金小姐。傳聞佢有次請咗個司機，新司機第一日返工就畀佢用粗口鬧到狗血淋頭，新司機見唔對路梗係即刻劈炮唔撈啦！
話說新司機第一日返工見到老闆好自然咁叫一聲︰「×小姐，早晨！」點知「瑤瑤」一聽到就破口大罵︰「×小姐係你呢啲賤人叫嘅？你呢啲賤人快啲死啦！」新司機都係禮貌咁同「瑤瑤」打聲招呼啫，點知咁都被人用粗口鬧。新司機第一日返工就見識到「瑤瑤」呢啲「極品」，梗係走夾唔抖啦，於是第二日就冇返工喇。新司機都係打份工啫，最多東家唔打打西家囉，如果要對住呢啲蠻不講理嘅富家女，真係賺埋啲錢都背脊骨落呀！