立法會每逢開大會，班議員就焗住要成日坐定定開會，好易坐到條腰都梗埋，最好就係定時起身行吓舒展筋骨。嗱！好似新民黨田北辰（田二少）就識歎嘞，喺上周三大會當日，見佢午飯時間後去咗中信大廈一間咖啡店攤抖，佢一路曬太陽，一路全神貫注咁玩手機，都可以話係偷得浮生半點閒。不過，點都諗唔到佢部手機咁「化學」，前日朝發展事務委員會開會，佢就因為部手機壞咗收唔到通知，因而開會遲到，成為其中一個釀成流會嘅議員，印證手機撳得多都折舊得快啲。
