政情:八網難逃:阿基入廠自比英皇室!?

民協立法會「超級」議員馮檢基(阿基)上星期三因病入院缺席立法會大會,之後佢原本有公開活動,但最後都甩底,因而令外界擔心佢嘅病情。我哋因此打過幾次電話畀阿基,甚至去佢屋企拜訪,但佢都唔肯接受訪問,點知佢尋日就喺社交網站貼文,話本報報道令佢同民協區議員不斷收到電話查詢,有街坊好擔心,有位仲喊到收唔到聲添。

最搞笑嘅係,阿基竟然搬出前排澳洲電台DJ冒認英女王打電話去醫院查探劍橋公爵夫人病況嘅例子,話傳媒唔識吸取教訓喎。

阿基作為政治人物缺席會議,未能就特首梁振英嘅不信任動議投票,仲要發張臥床醫院嘅相片放上網,大家對佢嘅健康產生懷疑都係理所當然,更甚係佢有乜依郁可能要補選議席,補選隨時被騎劫變成公投。不過,阿基唔接受訪問之餘,仲要自比為皇室成員,真係好牽強囉!

第一手消息請下載on.cc東方互動iPhone/iPad/Android/Windows Phone Apps