中央政策組前全職顧問劉細良將受聘於香港理工大學進行一項研究項目，前任行政長官及政治委任官員離職後工作諮詢委員會尋日就批准咗佢嘅離職後工作申請，但條件係佢嘅工作唔可以令政府尷尬。
不過，劉細良離職後有份搞嘅網絡媒體就經常批評政府，唔知咁樣又算唔算令政府尷尬呢？
劉細良將會受聘於理大進行研究工作，開始工作日期係明年一月。諮詢委員會就認為佢嘅工作唔會構成任何潛在嘅利益衝突，亦唔會預期有關工作會引起負面的公眾反應或公眾觀感而令政府尷尬，所以批准佢嘅離職後再就業申請。我哋問過劉細良，佢就話雖然自己任職中策組全職顧問時係以非公務員合約受聘，但係離職前都有同事提醒佢離職後再就業都要跟番指引，所以佢咪提交申請囉。
查實劉細良離開中策組後就同人共同創立咗一個網絡媒體，但係就冇向諮詢委員會申請喎。
佢就解釋話，係因為佢喺呢個網絡媒體嘅工作係冇受薪嘅，所以就唔使申請咁話。之但係呢個網絡媒體都經常批評現屆政府，令政府尷尬，係咪都有違反指引之嫌呢？