前日星期六，特首梁振英（CY）又拉埋一班局長同常秘開會，一齊「鑽」出房屋土地政策，發展局局長陳茂波（Paul）仲去完上海一落機就被召喚去開會。不過Paul就疑似被揸乾鑽盡，尋日出席活動時，無貨到叫大家搭升降機搭得開心啲。
話說《升降機及自動梯條例》今日全面實施，尋日Paul出席《條例》啟動禮時就話，《條例》將進一步提升香港升降機及自動梯嘅安全，簡直就係升降機及自動梯安全發展嘅一個里程碑，所以Paul祝大家以後搭升降機「搭得開心，放心，更加安心！」
