政情：賣股權 齊分錢 馬時亨良心僱主
今時今日無論係老闆定係打工仔，都呻搵食艱難。前高官馬時亨（肥亨）尋日出席管理專業協會舉辦嘅「逆勢飛揚」講座時，勸勉僱主要識得同員工分享成果，佢自爆十幾年前同一班股東齊齊出售元氣壽司股權時，畀咗包括大廚在內嘅主要僱員一筆錢，部分僱員更多達七位數字，即係數以百萬元計，認真有良心。
肥亨喺講座分享嘅主題係「世界已變，你有變嗎？」佢總結過去四十年經歷，話世界出現咗七大變化，包括科技、經濟版圖及製造業嘅世界分工等，其中僱主與僱員嘅關係亦變晒，以前下屬對老闆十分恭敬，依家就冇大冇細喇！
自爆廿年前豪事
肥亨講講吓仲自爆，二十年前曾經係元氣壽司嘅股東，後來出售股權，投資回報高達六十倍，可以話係佢最成功嘅一次投資。當時一班股東心哋都唔錯，帶頭喺聖誕節當日午市後關門，畀員工參加人人有獎嘅聯歡派對，而賣盤後仲超豪爽咁同員工分享利潤添。難怪肥亨有感而發話，做老闆唔可以成日黑口黑面，要氹員工先至可以提高士氣。佢仲話，打工仔唔應該一年跳幾次槽，咁社會就冇咁多矛盾喇！