咦，廉政專員公署剛剛推出最新一輯宣傳廣告喎，呼籲市民「堅守核心價值，維護廉潔香港」咁話。宣傳片嘅創作意念以雞蛋象徵香港人嘅廉潔核心價值，強調不論身份或者階層，只要貪污腐化，社會絕不容忍。廉署首席傳媒宣傳創作主任李程寶嫻係咁講嘅，宣傳片繼續使用「香港，一直勝在有你同ICAC」為口號，再次凸顯長久以來市民係廉署打擊貪污不可或缺嘅夥伴。
講係講得非常之咁漂亮，不過功夫茶想問一問廉署各位大老爺以及大姑奶，前特首貪污腐化係唔係應該絕不容忍呀？如果真係絕不容忍，曾蔭權爵士東窗事發已經大半年有多嘞，因乜事幹仲未請佢飲咖啡呀？喂，既然市民係廉署打擊貪污不可或缺嘅夥伴，嫉惡如仇嘅東方報業集團作為市民一分子，早就透過連環獨家報道揭發咗呢一個「香港第一貪官」嘅涉嫌罪行啦，點解廉署唔重視夥伴提供嘅資料順藤摸瓜去查處貪官呀？
莫講話東方作為市民一分子等到頸都長，仍然未等到正義得以伸張，即使係其他市民都覺得忍無可忍啦。最近喎，廉署附近行車天橋墩出現咗一句大投訴，有人奮筆疾書八粒大字「反對廉署包庇貪曾」。由此足以說明，廉署打擊貪污不可或缺嘅夥伴已經唔耐煩，畢竟人類嘅忍耐力係有限o架，唔可能毫無止境任得你一拖再拖玩包庇。
正所謂咯喎，擒賊先擒王，如果廉署確係有心肅貪倡廉，最好當然係痛打大老虎啦，藉此殺一儆百震懾所有牛鬼蛇神吖嘛。萬一大老虎逍遙法外，咁就大劑嘞，牛鬼蛇神少不免有恃無恐。事實上，官場腐敗已經有迹可尋，廉署今年首十一個月，收到三千七百多宗貪污投訴，較去年同期上升百分之二，當中三分一涉及政府部門，較去年同期急升一成三。
喂喂喂，涉及政府部門嘅貪污投訴上升一成三，絕對唔係一個小數目，簡直等於響起刺耳嘅警鐘。你知啦，人類嘅劣根性之一係有樣學樣，一旦見到人哋胡作非為，自己不期然都會為非作歹。就好似六七十年代嘅香港，亦好似今時今日嘅內地，你貪我貪個個貪，結果就係清官反而淪為備受壓迫嘅少數族裔。
貪污問題諮詢委員會主席史美倫都話啦，國際組織將香港嘅廉潔排名下調兩級，相信係因為涉及政府高層嘅貪污引起國際關注。政府高層係邊個呀？咪就係有損香港清譽嘅貪曾囉！
大家千祈唔好怪功夫茶長氣，一次又一次要求廉署盡快將貪曾繩之以法。無他嘅，伸張正義必須具備鋼鐵一般嘅意志，死咬唔放先至有機會防止亂臣賊子繼續禍港殃民吖嘛。