政情：潘佩璆被當反對派
前立法會議員潘佩璆雖退下咗火線，仍然關心社會。特首梁振英（CY）尋日出席施政報告及財政預算案諮詢論壇，其中有一群聲稱經「愛護香港力量」喺網上召集嘅二、三十名市民，喺諮詢論壇開始前喺門口守候CY，仲大叫「支持CY！支持CY！」工聯會副會長潘佩璆（潘醫生）就喺人群裏面。不過可能場面太混亂，潘醫生竟然被自己人誤以為係敵方一員。
潘醫生話，佢參與其中係因為認同「愛護香港力量」嘅理念，喺網上見到佢哋嚟聲援CY，所以咪出席囉。雖然潘醫生頗樂在其中，但同佢同陣營嘅成員見到有記者同潘醫生傾偈，竟然以為潘醫生係反對派人士，仲要記者為佢解圍，話潘醫生係工聯會前立法會議員嚟，搞到場面頗尷尬。
話晒潘醫生都做咗四年立法會議員，但同樣以主打「愛國愛港」旗號嘅團體竟然唔知佢係乜水，似乎工聯會啲議員知名度低咗啲喎。潘醫生其實一度考慮過今年九月循港島參加立法會直選，但後來因為知名度無法提升，最後至作罷。睇尋日嘅情況，佢決定唔參選，真係太明智嘞。