政情：現眼報 林大師遭狠摑
代表中華廠商聯合會嘅立法會議員林大輝前日變身「林大師」，喺立法會答問大會怒斥特首梁振英（CY）喺特首選舉時攻擊對手前政務司司長唐英年有僭建，依家因大宅僭建受圍攻係「因果循環，報應不爽」，成功出晒位同贏得唔少反CY人士掌聲。估唔到相隔唔夠廿四小時，林大師就因為「妄語」而「現眼報」，畀佢嘅幕後「老闆」廠商會高調發稿力撐CY，狠狠摑佢一巴。
前日答問大會多位喺特首選舉時支持過唐唐嘅議員，都不約而同藉重提唐宅僭建批評CY，當中以外號「唐英年家臣」嘅林大輝最出位，一邊雙手合十，一邊引用佢嘅佛學師傅名言，狠批CY僭建事件係「因果循環，報應不爽」，又引用六祖慧能嘅禪語，揶揄CY起磚牆自封僭建密室，係「本來無一物，何處惹塵埃」。林大師鬧CY鬧到咁盡，大家自然聯想佢今日會對不信任CY動議投贊成票。
施榮懷：咁啱尋日確定字眼
不過，大輝所代表嘅廠商會，尋日下午竟然發出題為「繼續支持以行政長官梁振英為首的新政府依法施政」嘅新聞稿，強調CY已就僭建事件向全港市民道歉，該會希望事件可告一段落，各界以大局為重同香港整體利益出發，避免引發任何管治危機，疑似係不點名批評林大師唔顧全大局，甚至疑似要求佢唔好贊成不信任動議。
我哋問過廠商會會長施榮懷，佢聲稱今次出稿已醞釀咗一段時間，咁啱喺尋日朝早開會確定字眼，並非針對林大師前日嘅言論而來，亦唔覺得對方最近言行同聲明內容有衝突喎。同林大師一樣支持過唐英年嘅施榮懷強調，特首選舉已經結束，甚至唐營梁營早已經不存在，依家香港有好多經濟民生問題，有待新政府去解決。
今日投票 消失免尷尬？
施榮懷又特別提到，早前該會向CY提出希望喺武漢整番個永久嘅工展會場地，畀佢哋啲會員推廣業務，其後湖南省領導訪港，佢向對方當面提出有關訴求，點知對方隨即話CY已經代廠商會向佢哋提咗，反映CY「講得出、做得到」，真心為香港廠家同中小企做實事。
「講得出、做得到」呢句說話咁熟口熟面嘅？之唔係唐唐嘅競選口號之一囉！幕後老闆都出咗聲嘞，睇吓林大師今日會投反對票定係棄權票，還是如佢所講「本來無一物」，乾脆自動消失，唔投票避免尷尬呢？