廉潔貶值人人憎 香港弊在有貪曾

之但係好可惜吖，花無百日紅，今非昔比咯，自從香港出咗一個貪得無厭嘅前特首曾蔭權，莫講話香港嘅廉潔程度大打折扣，連廉署嘅威望都江河日下。無他嘅，一屁股坐上全港第一把交椅嘅曾爵士居然傍實富豪黐飲黐食，而廉署話就話調查，竟然一拖再拖至今都冇正式行動檢控「香港第一貪官」，你話廉潔奉公嘅核心價值又點會唔貶值吖？

廉潔程度大打折扣呢家嘢，唔係功夫茶信口雌黃o架。國際組織「透明國際」發表全球清廉指數，以一百分為滿分，分數愈高代表愈清廉，你估香港攞到幾多分吖嗱？答案係七十七分，表面上似乎中規中矩，實際上令人大失所望。喂，全球一百七十六個國家同地區之中，香港只係排名第十四咋，比起去年嘅排名第十二下跌兩級呀，問你驚未！

更加令香港人自我感覺不爽嘅係，長期競爭對手新加坡以八十七分遙遙領先，人哋全球排第五，單計亞洲排第一，香港人唔自慚形穢就假啦。所以話啫，一粒老鼠屎真係會搞臭一鍋粥，一個曾蔭權確係會佗衰一個家。

「東方報業民意調查」結果顯示，對於香港廉潔排名連跌兩級至第十四，三成八受訪者認為，令人質疑香港官商勾結問題嚴重；兩成三斥責曾蔭權貪腐事件拖累香港；兩成二覺得香港信任度下跌。至於香港嘅廉潔排名遠低於新加坡又點睇？三成二受訪者話呀，反映香港營商吸引力比新加坡遜色；兩成九覺得香港競爭力受損；兩成一認為香港被新加坡拋離。

提到曾蔭權佗衰家，不得不提廉署至今「刑不上大夫」。民調又顯示，三成六受訪者不滿廉署進度不理想，必須盡快交代；兩成五批評廉署調查高官權貴懶懶閒，未能挽救香港嘅廉潔聲譽；兩成二直斥廉署失職，懷疑放生曾蔭權。

講真吖，現存嘅《防止賄賂條例》實在有問題o架，漏洞大到無法約束特首，令人擔心特區之首有權凌駕法律。關於特區政府研究將《防止賄賂條例》嘅約束力擴大至特首，但未有立法時間表，三成五受訪者認為防貪條例存在漏洞，應該盡快堵塞；兩成九指出盡快立法可提升香港廉潔形象；兩成七要求糾正制度，防止貪曾事件重演。

總而言之，廉潔貶值人人憎，香港弊在有貪曾，如果唔想香港繼續沉淪，快快手將貪曾繩之於法啦，唔該！