政情：黃友嘉出力團結工商界
由七位工商界專業界立法會議員包括梁君彥、林健鋒等組成嘅團體，今個月十八日舉行成立典禮，為咗搞得有聲有色好好睇睇，近排「七小福」四出羅致高人加入，據聞「七小福」嘅顧問團人強馬壯，廠商會永遠名譽會長、香港工商專業聯會主席黃友嘉同醫管局主席胡定旭、廠商會會長施榮懷都係顧問之一。
得到特首梁振英賞識並重用嘅黃友嘉尋日承認，「七小福」有搵佢做顧問，佢亦一口答應咗，因為佢覺得香港需要一個平台去團結工商界力量。佢講明自己唔係掛名咁簡單，係會真正落手落腳做研究。黃友嘉喺商界都算重量級人馬，梁振英亦委任咗佢做扶貧委員會同經濟發展委員會籌備小組成員。
據聞除咗黃友嘉外，好多政商界名人都會畀面擔任顧問一職，目前最少有十名顧問，連「肥胡」胡定旭都係其中一人。雖然說梁振英賞識黃友嘉，但佢都有份提名唐英年選特首，唔知「七小福」搵咗佢哋兩人加入後，係咪意味會「反梁復唐」？不過據「七小福」中人透露，佢哋絕對唔想推翻梁振英，佢哋只係支持香港喎。