政情：要在失敗中改變策略 劉業強盼有精彩日子
唔輸過又點知贏可貴？鄉議局主席劉皇發公子劉業強（Kenneth）對呢句話深有感受，佢投資賽馬廿年，中間有起跌，最大得着係會從失敗中改變策略達致成功。嚟緊周日，佢與一班朋友共同擁有嘅團體馬「精彩日子」，會出戰香港一哩錦標賽，佢話個馬名係想延續退役愛駒「好日子」嘅精神，望馬主們每日都生活得咁精彩。
Kenneth鍾意賽馬係受到爸爸同爺爺影響，佢話自細三爺孫已經成日喺電視機前面觀賞賽事，而爸爸發叔名下愛駒系列之所以用「龍船」命名，原來係因為佢居住嘅龍鼓灘地貌似足隻龍船，加上發叔鍾意睇扒龍船，所以就幫爸爸名下愛駒取此名。之後Kenneth飛英國留學，結識到經營馬販及農場嘅書友，造就咗佢為家族物色良駒返港競賽嘅好機會。
Kenneth透露與「精彩日子」緣起於兩年多前，一次機緣巧合下以廿五萬澳幣（約二百萬多港元）購入。駿駒喺當地受訓三個月後首次出賽，即以大熱姿態勝出，大家都驚喜萬分。「精彩日子」月前勝出香港回歸盃，頒獎時大會奏起國歌一刻，Kenneth坦言感到無上光榮，佢話呢啲就係最有意義嘅回報囉！