派利是多多關照
話說前排有位鄉音未改嘅參選人喺報名參選前夕，拉埋幾個朋友仔請食飯做公關工夫，佢哋叫咗一枱食物，仲準備咗利是。而派利是嘅任務就落喺一個貌似撐場壯膽嘅朋友仔身上，無論你話唔好、定係耍手擰頭，朋友仔都照塞可也，仲靜靜雞話呢個係交通費，叫大家「千祈唔好同你老細講！」如果你遲到早退、或者一時唔記得將利是拎走，仲有人追出門口配合補漏，務求做到人人有份永不落空。
相信講到呢度，一個稍為受過香港教育嘅人都會諗，今次廉署又有排忙喇！不過，香港人你今次錯喇！事關呢場選舉係不受防賄條例規管嘅，極具中國特色，參選人出動鮑魚、魚翅甚至利是都得，好自由o架。