政情：鬍鬚曾對007「感同身受」
財政司司長曾俊華（鬍鬚曾）一向都鍾意睇戲係人都知，佢尋日就喺網誌自爆，以前最鍾意同老婆咬住碌蔗睇午夜場，而且前排仲同老婆一齊睇咗新一套鐵金剛早場。鬍鬚曾話，其實睇完後一早想寫影評，不過又怕「劇透」所以就忍到尋日先出網誌。希望鬍鬚曾出完影評，了咗件心事後，可以收心養性寫預算案啦！
短匕首或有寄意
鬍鬚曾話，成套戲最叫人印象深刻嘅，係軍情六處主管M出席下議院調查委員會聆訊時被圍攻嘅窘境，鬍鬚曾話佢直情「感同身受」喎，至於點解？大家自行心領神會啦！唔知係咪要避免再遇窘境呢？鬍鬚曾講到最後，又刻意叫大家留意吓，今集電影無再為007設計新嘅「神奇法寶」，佢揸住部舊跑車、拎住一支槍、一部無線電，最後仲憑住一把了無新意、平平無奇嘅短匕首殺死壞人。
鬍鬚曾仲意有所指咁同大家講，其實現實世界中，「能夠真正解決問題」嘅，可能都係嗰把了無新意、平平無奇嘅短匕首。咁講法，唔通鬍鬚曾係為佢出年嗰份做實事但平平無奇嘅預算案搭定下台階？佢把平平無奇嘅短匕首，唔會係亂派錢啩。