政情：泛民分身術 阻長津撥款
只是一個社民連立法會議員梁國雄（長毛），已經可以將勞工及福利局局長張建宗同其他六十幾位議員玩殘，如果有多幾個一式一樣嘅長毛，情況真係不堪設想。雖然長毛唔識分身術，但佢有幾位泛民盟友就精於此道，每次立法會舉行公聽會，都派出大批黨員、職員同支持者，以不同身份出席發言講埋同一樣嘅嘢，務求自製民意同消耗大家時間，做法仲陰濕過明刀明槍嘅拉布戰！
早幾年立法會每次就啲政治性議題舉行公聽會，好似政改方案、廿三條立法、修訂《公安條例》等，政府同建制派都動員支持者同友好屬會，大量派員出席會議撐政府，畀泛民批評為歪曲民意。近年政府同建制派已經好少出呢招，反而泛民就唔怕面懵，公然抄橋，仲將分身大法發揚光大，希望以寡敵眾，少數扮多數。
例如立法會福利事務委員會早前就長津撥款先後舉行咗三場公聽會，合共有一百零一個團體代表出席，但當中唔少其實都係來自同一個泛民黨派或組織，來來去去都係嗰班人，講嚟講去都係反對資產申報制度同爭取全民退休保障。例如近年新成立嘅激進八、九十後組織「左翼廿一」，就分別以「左翼廿一」、「左翼廿一勞工部」、「左翼廿一青年部」同「左翼廿一生產部」派人發言，一分為四。
一個黨分成多個團體代表
呢班後生仔嘅分身方法，其實已經算比較均真，唔及民主黨咁離譜。民主黨本身喺立法會已經有六名議員，仍以該黨名義派多一名代表出席公聽會。該黨同旗下嘅多名區議員，又以自己嘅區議員辦公室名義出席，以為唔提自己個黨名就無人記得佢哋係民主黨員。其中民主黨葵青區議員尹兆堅，仲改以「勞工基層動力」名義出席，隔一輪又用番民主黨名義出席另一場公聽會，真係畀佢玩殘。
本身已有四名議員嘅工黨亦有類似情況，工黨有派人，同該黨關係密切嘅職工盟有派人，職工盟轄下多個屬會又有派人，一個黨隨時分身做十多個團體同代表。睇嚟張建宗好應該效法警察交通部，整番幾個紙板局長公仔放喺立法會公聽會囉。