政情：張國柱送禮當打卡
時下年輕人去到邊都鍾意喺社交網站「打卡」簽到，原來工黨立法會議員張國柱為咗同老婆報到都要「打卡」，但唔係上網「打卡」，而係用出席活動時獲贈嘅一啲小禮物嚟送畀老婆，以證明自己真係去咗做嘢，無偷雞周圍去玩咁話。
好似尋日咁，阿柱就喺出席一間精神健康綜合社區中心嘅活動時忙裏偷閒親手整咗隻「毛巾兔」送畀老婆喇。
潘佩璆「肉體舒服咗」
阿柱尋日同一間精神健康中心嘅服務使用者一齊整「毛巾兔」，佢將條毛巾左扭右扭咗幾分鐘先搞掂，仲要中心職員提佢幫隻「毛巾兔」綁絲帶。點知佢整完後就話：「唔好嘥」，要送畀老婆！我哋以為佢咁慳皮，想咁就當聖誕禮物，點知佢話係要證明佢今日唔係偷雞去玩喎。
一向都關注精神健康問題嘅精神科醫生、工聯會前立法會議員潘佩璆尋日都有出席。唔使再喺立法會面對「拉布」困擾，佢話自己依家「肉體上舒服咗」，多咗時間幫病人睇症，又可以幫手培訓醫生，比起喺議會睇人「拉布」，點都對社會有啲實際作用喎。