政情：龍應台嘲離港似未收衫
曾在香港居住九年嘅知名作家、台灣文化部部長龍應台，今年二月離港返台後，尋日再度重返香江。佢下午喺文化部屬下嘅光華新聞文化中心公開現身，吸引各界好友到場相聚，呢位才女部長梗開心啦，仲形容當時臨時決定返台太匆忙，感覺好似晾喺露台嘅衫仲未收，認真識講嘢。
龍應台話，今次佢專程來港為光華主辦嘅「台灣月」文化活動打氣，同埋出席本周末喺香港大學舉辦嘅演講。佢喺港大教書八年，當年港大為佢專設寫作室，才女話永遠感激在心。其實佢都發揮咗犀利嘅觀察力，挖掘好多港人自己都唔知嘅香港故事，難怪香港文化界老友滿天下，資深文化人黃英琦、香港中樂團藝術總監兼首席指揮閻惠昌等人，都現身捧場。
不過，佢嘅身份已由筆鋒辛辣嘅作家變成台灣官員，講嘢謹慎好多。有人問佢有冇觀察到中港矛盾、反國民教育等議題，佢不假思索話梗係有觀察啦，但依家唔係作家，講嘢代表政府，所以唔可以立亂發表意見。令到想聽龍應台「辣妹」風格評論嘅粉絲們，不免有啲失望喇。