提議去北京 有人難入境
議會聯絡小組委員會日前開會討論今屆去邊度考察好，有人就建議要為香港將來普選做功課，因為將來好可能都係行番全區比例代表制，所以應該要去一啲議會都係實行緊全區比例代表制嘅國家睇吓。立法會秘書處搵過資料，話德國同以色列都可以選擇。不過，以色列依家兵荒馬亂，好多議員都話怕怕，一個唔好彩，未普選前先要補選，所以都係去德國好啲。
此外，亦有議員忽然心繫家國，話立法會議員都好應該去吓北京，睇吓全國人大開會。不過，問題係有議員不被獲准返內地，所以有議員就話呢個問題困擾咁多年，真係要解決。其實好多立法會議員都係人大、政協，佢哋都返唔少內地，去唔到內地嘅其實來來去去咪又係嗰幾個囉。