中環出更：青聯周沁牛一做學生
潮流興搞服裝派對，香港青年聯會副秘書長周沁（Dorothy）日前喺蘭桂坊酒吧illusion大搞校服生日派對，青聯班兄弟姊妹齊着白恤衫打呔，化身脆卜卜嘅學生哥、學生妹，仲請埋立法會議員謝偉俊（Paul）同全國青聯副主席陳仲尼一齊慶祝。卓妮同場仲見到馬會大董葉澍堃大仔葉瀚林（Hiram）同未婚妻Connie，佢哋即場宣布喜訊，於本周六拉埋天窗。
阿Paul嘅衣着經常有驚喜，當晚就着住中山裝赴會，但佢為咗迎合校服主題，就辯稱呢個係神父打扮喎，咁地位咪好高？無論係中山裝定係神父都唔重要，因為一樣受歡迎，全場索女「學生」都爭住同佢合照留念。另一個受歡迎嘅型男，相信要數攝影師曾學銘（Philip），當晚唔少女同學都指定要搵佢幫手揸機影相，細問之下，原來Philip就係霍家長孫霍啟剛同「跳水公主」郭晶晶嘅婚禮攝影師，之前Dorothy結婚都係搵佢操刀嘅。
葉澍堃大仔周六結婚
問Philip影世紀婚禮有啲乜嘢趣事分享，佢好口密話要尊重客人私隱喎。至於影得新娘子咁靚有乜秘訣，佢就好識做話，幸福嘅新人，點影都咁靚o架啦！
唔少人都趁龍年趕搭尾班車結婚，當晚Hiram就同未婚妻宣布會喺本周六註冊結婚，月中再大宴親朋。Hiram透露，婚禮攝影都係搵Philip操刀，好彩自己好早之前已經搵定對方幫手，唔係佢依家聲名大噪，分分鐘冇期幫唔到手呀！呢間illusion嘅老闆係青聯成員馮敬安，近期酒吧成為唔少富二代嘅蒲點，氣氛相當熱鬧。
卓妮