坐得喺電視幕前，最緊要係字正腔圓，發音要一絲不苟，否則會變成大笑話。亞洲電視執行董事盛品儒前日親身示範，一向講嘢帶鄉音嘅盛品儒，喺記者會批評緊城市電訊主席王維基離任亞視行政總裁時攞走咗亞視啲機密資料期間，就話：「呢啲嘢其實係眾所周知」，點知佢將「眾所周知」讀成「眾所鳩知」，聽聞台下嘅記者聽到後都忍唔住笑，最慘係台上嘅盛品儒涉嫌當眾爆粗仲懵然不知。
「眾所鳩知」片段隨即喺網上熱傳及改圖惡搞，有網民話呢件事相當可疑，估計盛品儒一定「鳩知」好多內幕嘢，所以收收埋埋懶神秘，亦有網民覺得佢用心良苦，特登爆粗谷高收視。不過，最抵死係有網民話，「鳩」其實係其中一種鳥類名稱，而且種類繁多，所以「眾所鳩知」可能係解作「唔止人知，連好多雀仔都知」喎，應該大讚盛品儒學識淵博，用字艱深，只係普通平民理解能力低啫。