四散人之首嘅中華廠商聯合會代表林大輝，向來以敢言見稱，自從特首梁振英（CY）上場後，佢經常發揮「大炮」角色，喺議會內外批評新政府官員，好似早前政府推出買家稅打擊炒樓後，佢就猛批政府自毀長城，破壞香港嘅自由經濟模式，發言時仲青筋暴現。不過，當鏡頭影唔到大輝時，估唔到佢又即刻收晒火氣變番另一個人。
話說早幾日大輝聯同幾位泛民主派、建制議員一齊見CY，大家各自就施政報告同財政預算案畀意見，但大家都買定花生等睇戲，想睇吓大輝點樣向CY發炮。點知眾人大失所望，事關當日閉門會議中，大輝全程火氣盡收，同平時判若兩人，會面氣氛相當和諧。
據聞當日會面尾聲時，大輝第一時間叫大家等等，因為佢想同CY影張合照，一來證明佢有向政府提供意見，二來張合照亦都可以擺喺自己份工作報告入面。
大輝仲叫民協馮檢基幫手影相，點知惹來在場議員效法，好似新民主同盟范國威、新民黨田北辰都雙雙同CY合照留念，估唔到CY同泛民嘅歷史性合照，都係由大輝一手撮合，真係世事難料。