政情：普通市民？范太你講晒
全國人大常委范徐麗泰一向敢言，但尋日報名參選人大時又忽然收口，講明自己要投入人大選舉工程，未來一段時間都唔會作出評論喎。正當大家要求范太以人大身份評論特首梁振英嘅僭建事件時，范太就嚟一招「金蟬脫殼」，話人大身份係負責為內地立法同監察中央政府，並唔係睇住香港內部事務，強調過去所講嘅嘢，係以「一個香港普通市民身份」發言，並唔係以人大常委身份發言喎。
其實作為普通市民，又點知范太幾時用人大常委身份，幾時用普通市民身份發言呢？唔通次次都要問佢用乜嘢身份發言？至於點解范太會突然收口，范太就話無收過指示，亦唔係擔心影響選情而收口，只係想用多啲時間聚焦選舉工程。問范太擔唔擔心低票當選人大，佢就話：「高票就高票，低票就低票，唔當選咪唔當選囉！」其實范太當選人大應該唔難，但能否連任人大常委就係另一回事喇。