自稱獨立、但一直被泛民主派質疑係「西環契仔」嘅建制派立法會議員謝偉俊（Paul），日前搶閘預告會喺下月十九日嘅立法會大會上，就大宅僭建事件向特首梁振英（CY）提出不信任動議，企圖快泛民一步搶飲頭啖湯攞分。不過，阿Paul唔好失憶，佢名下物業亦曾被揭發僭建同涉嫌經營非法旅館，雖然佢嘅僭建已拆，但真係要小心隨時被人抽後腳。加上民主黨胡志偉尋日擺明截佢胡，宣布搶先喺下月十二日向CY提出不信任動議，所以搞到阿Paul飲頭啖湯博出位不成，反骨就現晒形！
