政情：梁錦松否認轉工大計
尋日有報道話前財政司司長梁錦松會去招商資本做高層，負責操盤，仲話好快會公布。阿松就同我哋講，話消息不正確，因為佢只係去招商資本做非執行董事，佢嘅正職仍然係黑石集團（Black Stone Group）大中華區主席。阿松仲話睇好明年經濟添。
黑石集團係全球最大嘅私募基金之一，阿松喺○三年七月辭任財政司司長後，休息咗無耐就加入呢個機構，佢尋日話，佢喺黑石做得好開心，所以無計劃轉工。除咗份正職外，佢之前做工商銀行嘅獨立董事做咗六年半，依家又做招商資本非執董，係用另一角度為國家服務咁話。
投資係阿松嘅專業，話咁快就一年將盡，佢對來年經濟點睇呢？阿松話隨住歐美嘅經濟穩步上揚，好有信心中國同香港嘅中長期都能夠保持增長嘅動力，所以都係睇好嘅。阿松除咗財金範疇外，本身又係國際小母牛香港分會主席，同太太伏明霞落力支持內地同胞自力更生，生活不知幾豐盛，所以都唔使諗轉工喇。