政情：小三張志剛回鄉變愛國
行政會議成員張志剛尋日接受電台訪問時，大爆自己同中國嘅「愛情史」，原來佢嘅愛國情懷係由小三開始，當然唔係講緊做第三者嘅「小三」啦，其實係佢由小學三年班返東莞鄉下開始。原籍東莞嘅佢話，當年首次回到家鄉探親，印象好深刻，覺得啲稻田、河流等大自然環境好靚，雖然鄉親們好窮，但人情味就非常濃，會以最好嘅食物款待佢，親友之間會互相扶持，因此佢對國家嘅感覺一直都幾正面。
張志剛話，就算依家中國有腐敗、貪污等缺點，都不減佢嘅愛國情，佢仲以兩父子嚟比喻自己同中國嘅關係，話：「爸爸都成日打我o架啦，但佢始終都係我爸爸，兩父子冇記仇嘅！」又話相信問題好快會解決。佢仲話，童年時已好鍾意閱讀，每次爸爸帶佢去茶樓飲茶時，冇嘢玩就會睇報紙，所以好細個已經認得好多字，慢慢造就成為今日政府嘅「軍師」。
佢又憶述，年幼時所住嘅屋企就好似電影《七十二家房客》咁有好多住客，鄰居知道佢鍾意睇書，就主動借書畀佢睇，記得第一本睇嘅書係《西遊記》，之後更迷上《天龍八部》等金庸小說，從文字對國家產生難以解釋嘅感情。