政情：發叔搵女婿接班?
年屆八十七歲嘅鄉議局主席劉皇發，前日話自己做埋今屆就會收山，仲拋出做接班人嘅五大條件，但講到邊個可以接班，佢就話副主席張學明唔肯做，對於另一副主席林偉強又唔多願意評論，搞到個位好似冇人肯做咁，大家於是估發叔係咪想再做多屆。不過，有鄉紳透露，其實發叔多年來一直扶植其女婿、信和置業總經理余漢坤（Randy）上位，接班成為新一代「新界王」。
由八十年代開始，發叔一直連任鄉議局主席至今，雄霸新界足足幾十年，近幾年都開始傳佢會退下來，但次次都係由發叔做番主席。前日發叔又被問到下屆會否退位讓賢，佢就話自己都做咗好多屆，真係唔想再做主席喎，仲拋出接班人五大條件，包括做事夠熱心、人緣好、同政府傾到偈、得鄉親信任同最尾一項，就係有充足經濟能力。若要符合首四項條件都唔難，最難係要疊水。
轉戰直選 染指區會主席
本來劉業強有老竇發叔呢條大水喉射住，接班絕對不成問題，但發叔已講明怕外間有閒言閒語，甚至擔心害咗個仔，於是有鄉紳分析，餘下可以接班人嘅就只有女婿Randy。Randy喺大澳出生，到外國浸完鹹水返港大展拳腳，更連續兩屆獲委任為離島區議員。我哋收到消息，Randy下月會同現任離島區議員黃福根開設聯合辦事處，有傳黃福根下屆會退休，Randy就睇中呢個空缺，希望趁政府取消區議會委任制時，轉選呢個選區，如果當選，繼而挑戰離島區議會主席一職。
事實上，今次已經唔係第一次傳出Randy想喺區議會更上一層樓，今年年初區議會改選，已經有傳Randy想做離島區議會主席，但因為其他離島嘅鄉事委員會主席唔支持，結果退而求其次，做咗同樣有影響力嘅地區設施管理委員會主席。不過，下月開辦事處其實只係Randy更上一層樓嘅第一步，幾年後嘅發展係點根本冇人知，更遑論延續外父發叔喺新界地區嘅影響力。我哋曾經搵過Randy，但到截稿前仍未回覆。