中環出更：霍啟剛腕上錶散發品味
品味呢樣嘢考起唔少人，但有啲人天生一舉手一投足，自然會散發出獨有嘅魅力。霍英東家族長孫霍啟剛係城中公認嘅型男，日前佢同「跳水公主」郭晶晶舉行世紀婚禮，事前接受本報獨家專訪嘅時候，就做咗型男嘅最佳示範。當日佢戴上卡地亞Calibre de Cartier腕錶，平凡中顯出高貴氣派。
啟剛近年唔單止積極修身揮走baby fat，就連衣着服飾都愈來愈有品味，加上娶咗老婆之後，渾身都充滿成熟男人味。當日霍啟剛左手戴上呢隻靚錶，係由黑色鱷魚皮錶帶，配以鑲滿圓鑽嘅18K白金錶殼，錶冠就鑲嵌咗一粒鑽石及藍寶石水晶玻璃，斯文得嚟又夠大方，啱晒啟剛實而不華嘅風格。唔知佢有冇買多隻同款嘅女裝錶送畀晶晶，湊成一雙一對呢？
