政情：中環出更：「高」人姚明 獲港大頒學位

典禮開始時，港大播起最新灌錄嘅校歌，三名獲頒授榮譽博士學位嘅社會人士隨着校長徐立之、校監梁振英同埋一眾教職員步入會場。姚明高七呎四吋，真係無人能及，一行出嚟就高出其他人半個身位，呢位籃球巨星嘅出現更引起全場哄動。

不過，可能姚明太高，喺校方教授幫佢着上袍上飾帶時，有啲難度，姚明要九十度躬身相就。其後校方讀出對姚明讚詞，提到佢「笑口常開」同「引人注目嘅高度同國字臉時」，姚明又好調皮咁擺出相關嘅動作，盡顯作為「和善巨人」嘅一面。姚明就話今次接受港大頒授嘅榮譽學位除感到好榮幸，又話今次呢個學位對佢有激勵作用。

純官獲家人撐場

至於鄭家純，唔單止佢嘅家人喺台下熱烈拍掌，新世界集團旗下唔少高層都嚟捧場，認真夠派頭。純官身兼扶貧委員會委員，佢話希望好似佢咁做生意嘅人回饋社會，以盡本分。此外前終審法院常任法官包致金亦獲頒授名譽法學博士。

純官（中）獲博士銜，女兒鄭志雯（左）同丈夫龐建貽齊恭賀。

高度懸殊唔緊要，純官（前排左五）同姚明（前排左四）同獲港大頒授榮譽社會科學博士學位，後為梁振英。（黃仲民攝）

卓妮