政情：率六女將亮相 張鳳婷派定心丸
國泰女將巾幗不讓鬚眉！國泰航空新任企業事務董事張鳳婷（Chitty）昨日帶同六名女將同傳媒會面，當中五人任職企業傳訊部。Chitty喺國泰已經服務咗廿多年，又曾派駐海外多年，難怪佢剛上任，就已經對國泰內部運作瞭如指掌。
節流唔打員工主意
佢話國泰如要節流，會先考慮削減燃油開支，減少部分長線航班，點都未輪到打員工薪酬主意，即係唔會減薪喇，相信國泰機艙服務員聽到一定可以放下心頭大石，至於明年加薪幾多，佢就話未知喇。佢仲話，國泰打算明年聘請五百名機艙服務員添。
同場另一位令人眼前一亮嘅女將，係統領國泰九千名機艙服務員嘅總經理吳秀蘭（Liza），Liza話國泰嘅同事不少身懷絕技，有魔術師、馬拉松好手等，由於機艙服務員經常要飛嚟飛去，為咗同佢哋多啲溝通，公司每六個星期舉辦一次座談會，員工可以隨時參加，提問任何問題，遲啲仲會整番個app畀員工，等佢哋可以隨時發表意見添。