政情：工聯歌唱比賽 成就張明敏發迹
中華出入口商會副會長、「愛國歌手」張明敏以一曲《我的中國心》紅遍大江南北，較為年長嘅一輩幾乎無人唔識呢首歌，但就未必好多人知道佢嘅發迹史，原來係同工聯會有關。
首次參賽即奪冠軍
張明敏話，佢首次參加嘅歌唱比賽係七九年由工聯會舉辦嘅全港工人歌唱比賽，當時佢以一曲《汪洋中的一條船》勇奪冠軍，自此佢就同唱歌結下不解之緣，更同工聯會榮譽會長鄭耀棠（棠哥）結緣。
據聞當年有人穿針引線，令張明敏早於八四年就到內地春晚獻唱，堪稱最早到內地大型節目表演嘅歌手之一，認真巴閉。講開張明敏，不得不提佢今年都有參加港區人大選舉，最令人留下深刻印象嘅係，連佢張宣傳單張嘅主題都係《我的中國心》，並以紅底白字做主調。佢仲喺單張中自言，《我的中國心》係佢首本名曲，仲係有生之年嘅鞭策動力，唔知佢一旦順利當選港區人大，會否懷着感恩嘅心再次高唱《我的中國心》呢？