返工返學幫襯港鐵搭東鐵，大家聽得最多嘅兩句廣播應該係「乘客請勿超越黃線，上車時請小心月台與車廂間之空隙」。東鐵搭得多，廣播聽得多，大家失眠嘅時候應該可以用嚟取代數綿羊，催眠功效應該差不多。
唔知大家又有冇留意，東鐵最近嘅廣播唔止頻密咗，仲有少少變化添喎。新版本嘅廣播係「上車時請留意車廂與地面之高低」。既要小心空隙又要小心高低，港鐵話喎，部分東鐵站一直都有咁嘅廣播，提醒乘客要注意車廂與月台之間嘅「水平」，只不過最近擴展至東鐵全線咁解。
因乜事幹廣播多咗又變咗？原因其實好簡單，東鐵嘅安全問題始終未解決，一次又一次出現有人墮軌嘅恐怖場面，咁就惟有囉囉囌囌婆婆媽媽重複又重複，向乘客發放一個非常重要嘅訊息：小心啲呀，死得人o架！
好似上星期咁之嘛，東鐵大學站嘅空隙再次成為奪命陷阱，有一個女乘客差錯腳失平衡，咁就誤墮月台空隙嘞。不幸之中嘅大幸係佢識得匿喺月台邊路軌旁嘅凹位，咁先至絕處逢生執番條命咋。
港鐵一方面加密班次，另方面因應東鐵發生墮軌事故，所以就要求員工增加廣播次數，提醒乘客注意安全。問題係，做到冇停手嘅員工有意見喎。九廣鐵路車務員協會主席劉彩紅表示，東鐵線繁忙時間每逢列車到站，月台站長除咗要睇住閉路電視監察月台情況，又要廣播提醒乘客注意上落車安全，一個人難以同時應付咁多工作，所以有必要增聘人手。另外咯喎，協會要求所有月台安裝幕門。
對於安裝幕門呢一個老掉牙嘅陳年問題，功夫茶都唔知講過幾多次，講到口水乾嗰隻。之但係為咗蒼生幸福着想，惟有不厭其煩講多次。喂，好心賺錢賺到笑嘅港鐵快啲安裝幕門啦，月台只要繼續不設防，再苦口婆心嘅廣播都冇鬼用o架。政府宣傳片夠日日夜夜叫人唔好吸毒啦，沉淪毒海嘅衰仔衰女咪一樣咁多！
仲有一家嘢非常唔要得，車務員協會踢爆港鐵玩隱瞞，原來近日類似墮軌嘅事故唔止大學站一宗，有人跳落路軌衝過對面爬上月台，簡直險象環生。
必須坦白承認，功夫茶今日講嘅訊息冇乜新意，情況類似港鐵不斷重複「乘客請勿超越黃線」。之但係又冇辦法喎，港鐵冥頑不靈吖嘛，講極都唔聽，聽極都唔明，明極都唔做。功夫茶要講嘅始終都係嗰一句，安裝月台幕門啦，救人一命勝造七級浮屠呀，唔通為富不仁見到乘客死完一個又一個先至開心咩！