政情：今時唔同往日：發叔批何君堯兩個樣
鄉議局主席劉皇發同屯門鄉委會主席何君堯呢兩位新舊新界人物，呢幾年多次交鋒，關係時好時壞，到咗前日，何君堯仲去鄉議局踩場添。不過發叔尋日話，何君堯好起上嚟，UNCLE前UNCLE後咁叫佢o架。
兩年幾前，何君堯成功踢走發叔做屯門鄉事委員會主席，睇怕兩人嘅「世交」關係都要因此而決裂，點知何君堯去年選屯門區議會主席，投票前夕佢竟然約發叔飲茶，游說發叔發揮佢嘅影響力幫佢拉票。到咗今年佢喺新界西出選立法會，何君堯又要求發叔出手支持。點知到咗前日，何君堯竟然去鄉議局踩發叔場。
尋日發叔喺立法會講起何君堯，公開批評何君堯人前人後兩個樣，佢話何君堯當佢面就UNCLE前UNCLE後稱呼自己，背後就唔知佢點講嘞。發叔又話有人夾埋村民圍攻鄉議局，只係尋求剌激、挑撥村民之間嘅矛盾。似乎兩人要和好，都唔係咁容易。我哋尋日打過畀何君堯，但電話就無人聽。