按照民建聯（民記）嘅「成功爭取」往績，各位小朋友將來學踩單車可能要掛番個學神「Ｐ」牌喇。話說民主黨胡志偉尋日喺立法會提出質詢，希望政府可以重新考慮將單車列為通用交通工具之一，但政府就話近年嘅單車意外增加，所以唔鼓勵市民喺市區以單車作交通工具喎，結果惹來部分議員群起圍插。
民記梁志祥見狀即刻奮勇護駕，提醒大家踩單車真係好危險o架，建議所有初學者踩單車時都要掛番個學神「Ｐ」牌喎！至於呢個「Ｐ」掛到幾時？莫非梁志祥話你合格，你就合格？唔知佢做立法會議員新丁又使唔使掛番個「Ｐ」喺心口呢？因為萬一唔小心講錯嘢，對個黨影響都冇咁大吖嘛！
