日頭猛做，收工梗係要去輕鬆吓啦，尤其係班富二代，有得玩就當堂生猛晒，聽講佢哋近期蒲吧都興玩射乒乓波罰飲酒嘅遊戲。我哋有日遇到馬會大董葉澍堃個細仔葉瀚華（Ian），佢任職大律師，壓力都幾大吓，但佢同爸爸一樣咁識歎，收工一得閒時就鍾意蒲吧飲番兩杯，佢仲推介大家去位於灣仔杜老誌道嘅酒吧Tonno Club，話有得飲之餘仲有好嘢玩喎！
Tonno Club嘅裝修型格十足，設有三間豪華嘅私人貴賓室同露台區，最啱年輕人約埋一齊開party盡情玩。呢間Club仲有個特色，就係同時下好多吧一樣，有得玩一種美國好流行嘅「Beer Pong」遊戲，玩法係雙方喺一張類似乒乓波枱嘅長枱上，離遠用乒乓波掟向對方嘅酒杯，被掟中嘅一方就要罰飲酒。經常跟爸爸周圍試靚紅酒嘅Ian，酒量絕對唔嘢小，呢個遊戲又點會難到佢吖！
Ian話，呢間Club嘅風格同佢以前喺外國讀書時去開嗰啲吧好相似，所以依家每次落親去都重拾讀書時嘅感覺，特別有親切感。所以話呢，餐廳同酒吧嘅裝修設計都幾緊要o架，加上定期搞埋主題之夜，可以迎合唔同顧客嘅口味。