政情：漠視孔誕假期 湯恩佳鬧爆貪曾
孔教學院院長湯恩佳自貪曾曾蔭權時代，已積極要求政府將農曆八月二十七日孔誕定為公眾假期，可惜咁多年來，貪曾都係唔嗲唔吊，搞到依家都未成事。湯恩佳尋日出席一個粵劇宣傳活動時，批評貪曾在任時對孔誕假期闊佬懶理，佢話：「佢（指貪曾）係虔誠天主教徒嘛，只信佢心目中嗰個神，根本就冇心推動孔誕！」
孔教粵劇再度演出
湯恩佳話，唔少國家同地區都已經將孔誕定為教師節或慶祝節日，而自己多年來促請貪曾落實孔誕假期，但對方一味採「拖字訣」，企圖淡化件事，即係同對住幅牆講嘢無分別喇。湯恩佳坦言，特首梁振英（CY）對於孔教假期嘅態度就積極好多，依家佢將希望寄託晒喺CY身上，稍後會聯同十幾個政界人士一同邀請CY詳細傾傾，相信不久將來就有好消息。
湯恩佳首倡嘅孔教粵劇《孔子之周遊列國》，今年二月首次全球公演後反應熱烈，嚟緊喺下月將再接再厲，一連兩日喺葵青劇院演出。