政情：黨友踩親條尾 一舊雲棄做主席
民主黨下個月選新主席，接替因為立法會選舉大敗而引咎下台嘅何俊仁。早前白鴿黨一路吹風，話立法會新丁黃碧雲會出任新主席，點知佢上位後講錯嘢、投錯票，幾單嘢加埋再捧佢做主席已經冇咩可能。一舊雲尋日就話佢暫時唔考慮今屆做主席喎。
新人言語唔夠成熟
喺蜀中無大將情況下，胡志偉同一舊雲兩位立法會新丁一直都被視為出任白鴿黨新主席人選。志偉尋日就話，因為要搞好九龍東地區工作，如果做埋黨主席，擔心顧此失彼，希望畀兩年時間等九東工作有啲成績先至接主席一職。佢又話，白鴿友開會都有講起一舊雲，睇嚟大家都有啲意見。志偉話，咁樣正好反映作為新人言語會唔夠成熟、言語間會有啲唔準確嘅表達，所以自己都要小心啲。
不過唔知一舊雲係咪畀志偉踩親條尾，就自己死死氣話暫時唔考慮今屆做主席，因為做得主席就要有心理準備被注視，又話作為新丁都係要喺地區摸索吓喎。