政情：參選人大最怕西環凶鈴
港區全國人大代表換屆選舉如箭在弦，各有意參選人各出奇謀爭取各方支持，有人密密打電話或拜訪友好團體、寄出政綱宣傳單張，亦有人所有親中活動都「逢請必到」，總之為咗爭取各方支持可謂板斧盡出。不過，呢班人大參選人喺呢個選舉前夕有樣嘢係最怕嘅，就係最怕有西環嘅人搵佢哋傾偈，因為呢個意味「死神來了」，擔心會被勸退，變相宣布人大之路行人止步。
據聞下月十九日左右就會舉行港區人大換屆選舉，今日會先喺灣仔會展舉行人大選舉簡介會，並會最快喺後日開始展開為期九日報名期。有意參選者都加緊對外宣傳同表達參選意向，好似多名有意角逐連任嘅港區人大廖長江、雷添良、馬豪輝等尋日齊齊現身合照，睇得出佢哋對連任嘅決心。至於久未露面嘅前立法會議員梁劉柔芬同南旋集團主席王庭聰，則直奔有七十名選委嘅立法會拉票，認真鬥志可嘉。
落力拉票 各出奇謀
至於點解王庭聰會識得到立法會拉票呢？有政界中人爆料，王庭聰本身係新界社團聯會（新社聯）名譽會長，佢搵咗身兼新社聯副理事長嘅立法會議員陳克勤幫手做選舉經理人，有克勤仔做佢「盲公竹」，難怪識得到立法會拉票喇。不過，對於盛傳王庭聰入圍五人「力保」名單，有人就擔心此舉可能有反效果，搞到人大選民以為五人已有足夠票數，隨時出現「劉江華效應」大熱倒灶喎，所以一票都不能少。
同樣盛傳入圍「力保」名單嘅港島各界聯合會理事長蔡毅，原來已經整好咗競選網頁面世，佢尋日出席潮州商會活動時密密拉票，主人家嗌入席時仍然不停同其他人雞啄唔斷。同場更有人目擊某疑似候選人，一見到前港區人大吳康民，不惜連「帶位」工作都做埋，令人側目。另外，前保安局局長李少光亦正式「發功」向選委傳真競選傳單拉票，表明希望利用三十多年公職經驗服務國家同香港，究竟各參選人仲有乜拉票撒手鐧，相信會陸續曝光。